Монгол залуус “Буган чулуун хөшөө”-ний сэдэвт видео тоглоом бүтээлээ

Соёлын бүтээлч сарын хүрээнд хүүхэд, залуустаа Буган чулуун хөшөөний үнэ цэн, тэдгээрийн ур хийц, түүх, соёл, урлаг, гоо зүй, танин мэдүүлэх зорилготойгоор олон талт арга хэмжээг зохион байгууллаа.

Эдгээрийн нэг нь Буган Хөшөө сэдэвт видео тоглоом загварчлалын хакатон бөгөөд 130 гаруй залуус оролцож 72 цагийн дотор видео тоглоом бүтээж шилдгүүдээ тодрууллаа.
Хакатоны шилдгээр О.Отгонбаатар, А.Гантуул нарын гишүүдтэй “Mr.O” баг түрүүлж монгол залуус богино хугацаанд адал явдалт видео тоглоом бүтээж чадахаа харууллаа.

Дэлхий дахинаа үсрэнгүй хөгжиж буй бүтээлч үйлдвэрлэлийн нэг салбар нь видео тоглоомын зах зээл бөгөөд 2023 онд 180.3 тэрбум долларын орлого олох тооцооллыг гаргасан.

Тэгвэл Соёлын яамнаас дижитал контент, тоглоом хөгжүүлэлтийг Соёлын бүтээлч үйлдвэрлэлийн тэргүүлэх чиглэлээ болгон бодлоготойгоор хөгжүүлж, энэ салбарт ажиллаж буй залуусыг дэмжин ажиллаж байгаа бөгөөд дэлхийн зах зээлд өрсөлдөхүйц чадварлаг боловсон хүчнээ дэмжиж, мэдлэгт суурилсан эдийн засгийг бий болгохоор зорин ажиллаж байна.
Буган Хөшөө сэдэвт видео тоглоом загварчлалын хакатонд оролцсон бүх оролцогчдодоо баяр хүргэж амжилт хүсье