Монгол, Канад хоёр улсын соёлын салбарын хамтын ажиллагааг өргөжүүлнэ
Канад Улсаас Монгол Улсад суугаа Онц бөгөөд Бүрэн эрхт Элчин сайд Сандра Шуфаниг хүлээн авч уулзан хоёр улсын соёлын салбарын хамтын ажиллагааны талаар санал солилцлоо.
Уулзалтын эхэнд сайд Элчин сайдад итгэмжлэх жуух бичгээ өргөн барьж, үүрэгт ажилдаа томилогдсонд нь баяр хүргэж, энэ жил тохиож буй хоёр орны хооронд дипломат харилцаа тогтоосны 50 жилийн ойн баярын мэнд хүргэв.
Монгол Улсын Соёлын яамнаас музей, номын сан болон бусад архивын цахимжуулалтын чиглэлээр Канадад мэргэжилтнүүд мэргэшүүлэх, Монтреал хотод төвтэй олон улсын цирктэй хамтран монгол уран нугараачдыг албан ёсоор гэрээлж ажиллуулахад дэмжлэг үзүүлэх, энэ тал дээр Элчин сайдтай хамтран ажиллах сонирхолтой байгаагаа илэрхийлэхийн зэрэгцээ Монгол, Канад хооронд кино хамтран бүтээх хэлэлцээр байгуулах саналыг тавьж, ингэснээр хоёр орны кино уран бүтээлчид холбогдох сангуудаас дэмжлэг авах бололцоо үүсэх ач холбогдолтой онцоллоо.
Мөн Элчин сайд Сандра Шуфани Канадын уугуул иргэдийг хоёр талын соёлын солилцоонд хамруулах сонирхолтой буйгаа илэрхийлсэн бөгөөд Монгол Улс “Нүүдэлчин” дэлхийн соёлын фестивалийг хоёр дахь жилдээ зохион байгуулж, 2023 оны наадамд нүүдэлчин соёлтой улс орнуудын уран бүтээлчдийг оролцуулсан талаар түүнд танилцуулж, уг арга хэмжээнд тэдгээр иргэдийг оролцуулах боломжтойг хэллээ. Мөн уран бүтээлчдээ төрөл бүрийн соёлын арга хэмжээнүүдэд харилцан урьж оролцуулах талаар санал солилцов.
Уулзалтын төгсгөлд Элчин сайд Сандра Шуфани “Тамгагүй төр” жүжиг ИБУИНХУ-ын Лондон хотноо амжилттай тавигдсанд баяр хүргэж, Канад Улсад уг жүжгийг толилуулахад хамтран ажиллах болохоо илэрхийлж, соёлын салбарт цаашид улам идэвхтэй хамтран ажиллана гэдэгт итгэлтэй байгаагаа илэрхийллээ.