МОНГОЛ УЛСЫН КОНСЕРВАТОР БҮГД НАЙРАМДАХ АВСТРИ УЛСЫН ВЕНА ХОТЫН ХӨГЖМИЙН ИХ СУРГУУЛЬТАЙ ХАМТЫН АЖИЛЛАГААНЫ ГЭРЭЭ БАЙГУУЛЛАА

Монгол Улсын Консерватор нь 1957 оноос эхлэн Австрийн суут хөгжмийн зохиолч В.Моцарт, Ф.Шуберт, А.Берг, Р. Штраус нарын болон шинэ Венийн дэг сургуулийн төлөөллийн хөгжмийн бүтээлүүдийг сургалтын урын сандаа багтаасан ба анх удаа Австрийн хөгжмийн их сургуультай сургалт, уран бүтээл, эрдэм шинжилгээний өндөр ач холбогдолтой хамтын ажиллагааны гэрээ байгуулж байна.

Энэхүү хамтын ажиллагааны хүрээнд талууд сонгодог хөгжмийн хүрээнд багш, оюутан солилцох, хамтарсан уран бүтээл туурвих, Монгол-Австри хоёр орны хөгжмийн зохиолчдын бүтээлийг солилцох, эрдэмтэн багш нарын хамтарсан төсөл хөтөлбөр хэрэгжүүлэх, эрдэм шинжилгээ судалгааны бага хурал зохион байгуулах, Австрийн хөгжим судлалын эрдэмтэн Марко Кёлбл бусад судлаачидтай хамтран морин хуур, цуур болон угсаатны хөгжим судлалын төсөл зэргийг хамтран хэрэгжүүлэх юм.