МОНГОЛ УЛС ДАХЬ НҮБ-ЫН ХҮН АМЫН САНГИЙН ТЭРГҮҮН ХАЛИД ШАРИФЫГ ХҮЛЭЭН АВЧ УУЛЗАВ
Монгол Улсын Засгийн газар 2025 оныг "Залуучуудын жил" болгон зарласантай холбогдуулан ССАЖЗ-ын сайд Ч.Номин Монгол дахь НҮБ-ын Хүн амын сангийн тэргүүн Халид Шариф тэргүүтэй төлөөлөгчдийг хүлээн авч уулзлаа.
Уулзалтын үеэр НҮБ-ын Хүн амын сангийн судалгаанд тулгуурлан Монголын залуучуудад тулгарч буй асуудлуудыг тодорхойлж, тэдгээрийг шийдвэрлэх бодлого, арга замын талаар өргөн хүрээнд санал солилцов. Тухайлбал, залуусын оролцоог бодлого боловсруулах, шийдвэр гаргах түвшинд нэмэгдүүлэх, тэдэнд тулгуурласан хөгжлийн хөтөлбөрүүдийг хэрхэн үр дүнтэй хэрэгжүүлэх асуудлыг онцоллоо.
Мөн оюутан, залуучууд чөлөөт цагаараа ажил хөдөлмөр эрхлэх боломжийг өргөжүүлэх, гарааны бизнесийг дэмжих хууль эрх зүйн орчныг сайжруулах, тэдний нийгмийн идэвхийг өрнүүлэх чиглэлээр Засгийн газрын үйл ажиллагааны хөтөлбөрт тусгасан зорилтуудын талаар ярилцлаа. Түүнчлэн, НҮБ-ын Хүн амын сантай цаашдын хамтын ажиллагааны хүрээг өргөжүүлэх, хамтарсан төсөл, хөтөлбөрүүдийг хэрэгжүүлэх, бодлогын баримт бичгүүдийг шинэчлэх чиглэлээр тодорхой саналуудыг харилцан солилцож, зарчмын хувьд тохиролцов.