НҮҮДЭЛЧИН ДЭЛХИЙН СОЁЛЫН ФЕСТИВАЛЬД 169 МЯНГАН ХҮН ЗОЧИЛЖ, ОРОЛЦЛОО
Нүүдэлчин дэлхийн соёлын фестивалийн маань цар хүрээ өргөжин тэлж, дэлхийн 12 улсын 140 гаруй өвлөн уламжлагчид болон Монгол Улсын 21 аймаг, Нийслэлээс 880 гаруй өвлөн уламжлагчид оролцож нүүдлийн соёлоо сурталчлах 780 хөтөлбөр арга хэмжээг фестивальд хүрэлцэн ирсэн 169 мянган зочдод үзүүлж сонирхууллаа.
21 аймгийнхан, Нийслэлийн Соёл, урлагийн газрынхан маань бууриа цэвэрлэн буцахдаа байгалийн үзэсгэлэнт байдлыг хадгалан, бидний нүүдлийн соёлын онцлог болох байгаль эх дэлхийдээ гүн хүндэтгэлтэй хандах зарчмыг харууллаа. Монголчууд бид байгаль орчин, ус ургамал, мал амьтандаа ээлтэй, эх байгальдаа дасан зохицон амьдардаг гайхам соёлын өвтэй ард түмэн билээ.
Мөн Нүүдэлчин дэлхийн соёлын фестивальд 3 өдрийн турш аймаг, нийслэлийн 400 орчим соёлын бүтээлч үйлдвэрлэл эрхлэгчид болон 40 хоол үйлдвэрлэгчид оролцон, 21 мянга гаруй нэр төрлийн бүтээгдэхүүнээ худалдаж, нийт 2 тэрбум 210 сая төгрөгийн борлуулалт хийлээ. Цаашид бид өөрийн орны өвөрмөц онцлог, нөөцөд тулгуурласан соёлын бүтээлч үйлдвэрлэлийн салбарыг олон улсын чиг хандлага, технологийн хурдтай хөгжлийг уялдуулан эдийн засгийн бие даасан салбар болгон хөгжүүлнэ.