СОЁЛЫН БҮТЭЭЛЧ ҮЙЛДВЭРЛЭЛИЙГ ДЭМЖИХ ТУХАЙ ХУУЛИЙН ТӨСЛИЙН ДЭД АЖЛЫН ХЭСЭГ ХУРАЛДЛАА

Монгол Улсын Засгийн газраас Улсын Их Хуралд өргөн мэдүүлсэн Соёлын бүтээлч үйлдвэрлэлийг дэмжих тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх, улмаар чуулганы нэгдсэн хуралдаанд хэлэлцүүлэх бэлтгэлийг хангахаар УИХ-ын Боловсрол, соёл, шинжлэх ухаан, спортын байнгын хорооноос байгуулсан ажлын хэсэгт мэргэжил, арга зүйн туслалцаа үзүүлэх ажлын дэд хэсэг хуралдав. Ажлын дэд хэсгийн хуралд соёлын бүтээлч үйлдвэрлэлийн салбарын төлөөллүүд оролцож хуулийн төсөлд тусгах зарчмын зөрүүтэй санал болон найруулгын саналын томьёоллыг бэлтгэв.

ЮНЕСКО-гийн тайланд дурдсанаар соёлын бүтээлч үйлдвэрлэлийн салбар нь жилд 2,2 их наяд ам.долларын орлого бүрдүүлж, дэлхий даяар 30 сая хүнийг ажлын байраар ханган, дэлхийн улсуудын дотоодын нийт бүтээгдэхүүний 10 орчим хувийг бүрдүүлдэг томоохон салбар болон хөгжиж байна. Манай улсын тухайд соёлын бүтээлч үйлдвэрлэлийн салбар 481.4 тэрбум төгрөгт хүрч улсын дүнгээр 1.4 хувийг эзэлж, энэхүү салбарт 5600 гаруй ААН идэвхтэй үйл ажиллагаа явуулж байна.

Соёлын бүтээлч үйлдвэрлэлийг дэмжих тухай хуулийн төсөлд соёлын бүтээгдэхүүн, үйлчилгээг эдийн засгийн эргэлтэд оруулах, төрөөс үзүүлэх дэмжлэгийг тодорхой болгож, салбарын түншлэл, хөрөнгө оруулалтыг нэмэгдүүлнэ. Мөн соёлын бүтээгдэхүүн үйлчилгээг бүтээх, түгээхтэй холбоотой үе шат бүрд бүртгэл, мэдээллийн тогтолцоо нэвтэрч, соёлын салбарын нийгэм, эдийн засгийн ач холбогдлыг хэмжих боломж бүрдэнэ. Хуулийн төсөл батлагдсанаар Монгол Улсад соёлын бүтээлч үйлдвэрлэл эрхлэх ААН, уран бүтээлчдэд үйл ажиллагаа явуулах таатай нөхцөлийг бүрдүүлснээр ДНБ-д эзэлж буй 1.4 хувийг 2030 он гэхэд 4 хувьд хүргэж өөрийн улсын соёл түүний онцлогийг шингээсэн соёлын бүтээгдэхүүн үйлдвэрлэж чадвал цаашдаа эдийн засгийг солонгоруулж уул уурхайн бус экспортын орлогыг нэмэгдүүлэх боломж бүрдэнэ.