ССАЖЗ-ЫН САЙД Ч.НОМИН НҮБ-ЫН ХӨГЖЛИЙН ХӨТӨЛБӨРИЙН СУУРИН ТӨЛӨӨЛӨГЧ МАТИЛДА ДИМОВСКАГ ХҮЛЭЭЖ АВЧ УУЛЗЛАА
Монгол Улс дахь НҮБ-ын Хөгжлийн хөтөлбөрийн Суурин төлөөлөгч Матилда Димовскаг ССАЖЗ-ын сайд Ч.Номин хүлээн авч уулзаж, залуучуудын хөгжлийг дэмжих цогц стратеги боловсруулах, бодлого төсвийн уялдааг хангах замаар үр дүнд суурилсан нэгдсэн удирдлагыг төлөвшүүлэх чиглэлд хамтын ажиллагааг өргөжүүлэх тухай хэлэлцэн, санал солилцлоо.
Уулзалтаар ССАЖЗЯ салбар тус бүрээс дөрвөн албан хаагч томилж, НҮБ-ын Хөгжлийн хөтөлбөрийн холбогдох мэргэжилтнүүдтэй хамтарсан ажлын хэсэг байгуулж, ирэх дөрвөн жилийн үйл ажиллагааны төлөвлөгөөг боловсруулах, залуучуудын хөгжил болон тогтвортой аялал жуулчлалын салбарт НҮБ-ын Хөгжлийн хөтөлбөртэй хамтран стратеги төлөвлөгөө боловсруулах, залуучуудын дуу хоолой, үзэл бодлыг шийдвэр гаргах түвшинд тусгаж, идэвхтэй оролцоог нэмэгдүүлэх зорилгоор олон талт уулзалтуудыг зохион байгуулах хүсэлтэй буйгаа илэрхийлэв. Мөн Соёл, спорт, биеийн тамирын салбарын төсвийн зардлын шинэчлэл болон үр дүнд суурилсан нэгдсэн төлөвлөлтийг хийж, ССАЖЗ-ын яаманд төсвийн шинэчлэл хийхэд НҮБ-ын Хөгжлийн хөтөлбөртэй хамтран ажиллахаар тохиролцов.