ЮНИДРУА-ГИЙН КОНВЕНЦЫГ СОЁРХОН БАТЛАХ ТУХАЙ ХУУЛИЙН ТӨСЛИЙГ ХОЛБОГДОХ БАЙНГЫН ХОРООНЫ ХУРАЛДААНААР ХЭЛЭЛЦЭН ДЭМЖЛЭЭ
“Хулгайлагдсан, эсхүл хууль бусаар экспортлогдсон соёлын эд зүйлсийн тухай” ЮНИДРУА-гийн конвенцыг соёрхон батлах тухай хуулийн төслийг УИХ-ын Аюулгүй байдал, гадаад бодлогын байнгын хорооны хуралдаанаар хэлэлцэн дэмжлээ.
Манай улс ЮНЕСКО-гийн 1970 оны “Соёлын үнэт зүйлийг хууль бусаар хилээр гаргах оруулах, түүнчлэн өмчлөх эрхийг шилжүүлэхийг хориглох, урьдчилан сэргийлэх арга хэмжээний тухай” конвенцод нэгдэн орсон. Гэвч 1970 оны ЮНЕСКО-гийн Конвенцын заалтууд хэт ерөнхий шинжтэйн дээр хэрэгжүүлэхэд ихээхэн асуудал тулгарч буй харгалзан үзэж 1995 онд Итали Улсын Ром хотноо “Хулгайлагдсан, эсхүл хууль бусаар экспортлогдсон соёлын эд зүйлсийн тухай” ЮНИДРУА /Хувийн эрх зүйг нэгтгэх олон улсын хүрээлэн/-гийн конвенцыг баталсан. ЮНИДРУА-гийн конвенцод өдгөө дэлхийн 63 улс нэгдэн ороод байна.
ЮНИДРУА-гийн конвенц нь соёлын өвийг хамгаалах чиглэлд батлагдсан олон улсын конвенцуудыг хамруулан бодвол энэхүү конвенцод нэгдэн орсны дараа шууд хэрэгжүүлэх боломжтойн дээр ямар ч тохиолдолд эрх зүйн үндэслэл болж чадахуйц нарийвчлан тодорхойлсон заалттай юм. Тодруулбал 2013 онд АНУ-ыг хууль сахиулах байгууллагаас Монгол Улсын хилээр хууль бусаар нэвтрүүлж, худалдсан Т-батаарын олдворыг эргүүлэн өгөх үйл ажиллагааг 1995 оны конвенцод үндэслэн зохион байгуулсныг дурдаж болно.
Монгол Улсын хувьд гадаадаас соёлын эд зүйлсийг импортлох хэрэгцээ шаардлага бага хэдий ч өөрийн түүх соёл, өв уламжлал, ёс заншилд холбогдох эд зүйлсийг хууль бусаар хилээр гаргахаас урьдчилан сэргийлэх эрх зүйн орчныг боловсронгуй болгож, үндэсний чадавхыг бэхжүүлэх хэрэгцээ шаардлага өндөр байна. Иймд уг конвенцыг соёрхон батлах тухай хуулийн төслийг УИХ-ын Аюулгүй байдал, гадаад бодлогын байнгын хороогоор хэлэлцэж УИХ-ын чуулганы нэгдсэн хуралдаанаар хэлэлцэх эсэхийг дэмжлээ.