“ҮНДЭСНИЙ БИЧИГ СОЁЛ, НОМЫН ӨДРҮҮД-2024” НЭЭЛТЭЭ ХИЙЛЭЭ

“Алсын хараа-2050” Монгол Улсын урт хугацааны хөгжлийн бодлого, Нийтээр тэмдэглэх баярын болон тэмдэглэлт өдрүүдийн тухай хууль, “Монгол Улсын Ерөнхийлөгчийн 2012 оны 158 дугаар зарлиг”-ийг хэрэгжүүлэх зорилгоор “Үндэсний бичиг соёл, номын өдрүүд-2024” арга хэмжээг Монгол Улсын Ерөнхийлөгчийн ивээл дор 2024 оны 09 дүгээр сарын 13-аас 22-ны өдрүүдэд улс орон даяар нэг өнгө төрх, нэгдмэл агуулгатай нийтийн номын сан, соёл, урлагийн байгууллагуудын оролцоотойгоор соёл, урлагийн болон бүх шатны боловсролын байгууллагууд, ном  хэвлэн нийтлэгчид, иргэд, олон нийтийг хамруулан зохион байгуулж байна.

Зохиолч, хэвлэн нийтлэгчид бүтээлээ нийтэд толилуулж, үзэсгэлэн, уралдаан өдөрлөг, уншигч зохиолчдын уулзалт, номын нээлт, бүтээлийн үзэсгэлэн, ном унших идэвх, санаачилгыг өрнүүлсэн, уншлагыг дэмжсэн  “Илүү их уншъя” уриатай  Номын баярын нэгдсэн арга хэмжээ Сүхбаатарын талбайд эхэллээ.

Аливаа улс үндэстний хувьд эх хэл түүнийг тэмдэглэж ирсэн бичиг нь тухайн үндэстэн оршин байх үндэс, тусгаар тогтнолын баталгаа болдог билээ. Монгол Улсын Засгийн газраас 2024 оныг “Үндэсний бичиг, соёлын жил” болгон зарлан монгол бичиг, эх хэлээ эрхэмлэн дээдлэх, хүүхэд залуучуудад сурталчлан таниулах  ажлууд өрнөж байна.